Djasabra, 8 di Yüni, 2019 na Katedral di Pietermaai den oranan di mainta durante di un Santa Sakrifisio di Misa solèm presidí pa Kapelan di Scouting Antiano Pastor  Morrison Laporte un grupo mucha i hóben di Scouting Antiano a risibí nan Promé Santa Komunion i Sakramentu di Konfirmashon.

Despues di un periodo di preparashon di kasi dos aña porfin e dia grandi a yega ku esnan ku a risibí nan Promé Santa Komunion por a risibí Kristu pa promé bes den nan bida i  nos hóbennan a konfirmá nan FE pa medio di e Sakramentu  di Konfirmashon, Spiritu Santu di Dios a baha riba nan.

Mayor, famia i amigunan di esnan ku a risibí i konfirmá a kompañanan na katedral di Pietermaai.

Pa medio di esaki Scouting Antiano kier a yama tur e mucha, hóbennan ku a Risibí i Konfirmá huntu ku nan mayornan masha pabien i ku boso sigui biba i proklamá e palabra di Señor Dios.

Un danki speshal na tur e katekistanan di Scouting Antiano ku a sa di kontribuí ku nan konosementu, tempu i amor den preparashon di e miembronan di Scouting Antiano pa nan por risibí e sakramentonan di Promé Santa Komunion i Konfirmashon.