Festival di Kor 2019

Jun 4, 2019

WILLEMSTAD – Djadumingu riba 2 di Yüni 2019, den e Sporthal di International School na Emmastad ku un sala kompletamente di “Sold Out”, diestres Grupo di Scouting Antiano, e asosashon di Scout di Curaçao a kompetí kontra otro den  Promé edishon di Festival di Kor “Singing Scouts”.

Direktamente despues di e apertura ofisial i un presentashon tur afó di Explosion Dansers, Gruponan a subi esenario kompaña pa banda òf pista di músika pa deleitá e públiko i nan fanatikonan presente ku Kanto, Shou, Baile i trahenan konfekshona espesialmente pa nan presentashon.

Kada grupo a prepará intensamente ku treinen, muzik i koreografia pa asina nan por a kompetí den e festival. Mirando e nivel di presentashon por konkluí ku hopi ora, energia i amor a wòrdu hinka den kada presentashon.

Pa e presentashon kada grupo mester a prepará tres kantika, un Gospel, un típiko di Kòrsou i un di Scouting

Mester bisa ku e bataya tabata hopi pèrta i a duna e hurado konsistiendo di hendenan versá den kanto i músika di nos komunidat, hopi doló di kabes pa por a saka e tres Gruponan ganadó.

Despues di 4 ora di shou i kanto, e hurado a skohe e siguiente Gruponan komo ganadó.

Grupo Ganadó Apsoluto  – Grupo Sint Antonius

Promé finalista                    – Grupo Cariben

Segundo Finalista               – Grupo C.N. Winkel

Premio Estímulo                 – Grupo NAFASI

Promé ku a pasa pa e anunsio di e ganadónan, Direktiva i Distriktonan 1 i 3 a homanegia nos Alto Komisario saliente – Frendsel “Pappy” Laucruz pa  su dies añanan ku ela para na kabes di nos asosashon – SCOUTING ANTIANO.

Pa medio di esaki direktiva i staf di Scouting Antiano, kier a yama danki i pabien na e komishon ku a planeá i ehekutá e festival i kada grupo di Scoutnan, nan miembronan i mayornan ku a traha hopi duru pa por a hasi e festival di kanto “Singing Scouts” un éksito rotundo.

Keda pendiente na edishon number dos di nos festival pa selebrá e 90 aña di Scouting riba e isla di Kòrsou otro aña 2020, ku Dios ke.

 

Contact Us

4 + 1 =

info@scoutingantiano.org

+59997374765