BARBER – Djasabra, 4 di Yanüari 2020, e organisashon di Scout di Curaçao – Scouting Antiano, a selebrá – Apertura di aña di Scout den e bario di Barber, na iglesia San Hosé. E tema di e apertura di aña di Scout 2020, tabata “Ban Biba Nos Leinan”. Nos kapelan Pastor Morrison Laporte a hasi e orashon di apertura pa tur Bever, Welp, Scout, Explorer i Lidernan presente. Den e seremonia den misa di Barber a instalá pastor Morisson Laporte ofisialmente komo kapelan di Scouting Antiano i tambe Abisha Hooi a wòrdu instalá komo Komisario di distrikto 1 di Scouting Antiano.

Komo parti di e apertura, tabatin tres tema di motivashon a wòrdu presentá. Kapelan Pader Morisson a splika tur presente ku nos mester komprondé e Lei di Dios i ku nos mester pone esakinan den práktika, tur ora i tur momento. Vandrik Otmara Rondei a elaborá riba e Lei di Pais, dunando ehemplonan bon kla pa tur por komprondé leinan di nos pais i na final Hòpman Araidna Nicasia a papia over di Lei di Scout, kaptando tur presente su atenshon.

Despues di e seremonia di apertura a repartí tur e sekshonnan di nos organisashon kaminda kada sekshon a hasi weganan hopi interesante i edukativo.

E aña aki Scouting ta kumpli 90 aña na Kòrsou. Ta un aña di húbilo pa rekordá i natural den un forma sensio selebrá. Den nos plan stratégiko tin diferente ophetivo ku nos kier logra. Pa e motibu ei ta importante no solamente pa selebrá pero pa durante kada aktividat den 2020, nos pone hopi énfasis riba e diferente ophetivonan aki pa nos logra nos metanan final. Apertura aña di Scout ta bira nos promé evento nashonal. Distrikto III tabatin na su enkargo pa organisá e aktividat aki.

Scouting Antiano kier a gradisí e tim organisadó di e Apertura aña di Scout ku a konsistí di vários lider balente di Distrikto 3 i vários otro lider ku a duna un man pa e mainta por tabata un éksito rotundo.