Di 18 pa 20 di Òktober 2019, Scouting Antiano e asosashon di Scout di Curaçao a partisipá na JOTA-JOTI 2019 ku ta e evento mundial di WOSM (World Organization of the Scout Movement) ku tradishonalmente ta wòrdu tene den e di tres wikènt di Òktober.

JOTA=JOTI ta para pa Jamboree on the Air i Jamboree on the Internèt, ta un evento edukashonal digital di Scouting ku tin un total di kasi 2 mion Scout di 170 pais ta partisipá na dje.

Na e evento di JOTA-JOTI e hóben por siña masha hopi di e teknologia nan di komunikashon i konektá ku rumannan Scout di rònt mundu.

Na Kòrsou nos a duna JOTA-JOTI un toke speshal kaminda kada aña di nobo nos tin un tema, rondó di kual eventonan i weganan di JOTA-JOTI ta basa riba dje, pa duna e hóben e oportunidat pa sera konosí ku algu rondó e tema di e evento.

Tema di e kampamentu pa e aña aki tabata: “Ban komuniká nos kultura”.

Den e wikènt di JOTA-JOTI e komishon organisadó a pensa di laga e hóbennan sera konosí ku diferente manera ku hende tabata komuniká ku den pasado.

Un bon kantidat di hóben den e edat di Scout i Explorer di Scouting Antiano a partisipá na e evento aki, huntu ku invitadonan di JLB, AGPNA i AJMG.

Pa medio di esaki Scouting Antiano kier a gradisí i yama pabien na e komishon organisadó di JOTA-JOTI 2019, ku a konsistí di hóbennan di Scouting Antiano, AGPNA, JLB i AJMG, pa un tremendo wikènt kaminda tur ku a partisipá a gosa un bòl i a siña hopi. Tambe nos kier a yama danki na spònsernan i personanan nan ku a duna un man na e evento aki.

Keda pendiente pa JOTA-JOTI 2020, den e aña den kual Scouting Antiano lo selebrá 90 aña di presensha di Scouting riba e isla di Curaçao.