WILLEMSTAD – Di 4 pa 7 di Oktober, Youth Network di Scouting Antiano a organisa e di kuater DCLT ku ta para pa Dutch Caribbean Leadership Training. E training aki a tuma logá na e Mancamp di Refineria Isla kaminda vários Scout di Scouting Antiano a partisipá.
Scouting na nivel mundial a kuminsá pone hopi atenshon riba partisipashon hubenil. Pa logra e ophetivo partisipashon hubenil, nos mester ekipá nos hóbennan ku abilidatnan i e aktitut nesesario for di un edat hóben.
Scouting Antiano siguiendo den e pasonan di e movementu mundial a lanta for di aña 2004 un plataforma di hubentut kual ta Youth Network Scouting Antiano (YNSA). Un di e tareanan di YNSA ta pa organisá tur aña un foro hubenil. Den e foro aki e hóbennan entre 15 i 27 aña ku ta miembro di e asosashon por bosiferá nan opinionnan i trese ideanan dilanti den forma di rekomendashon. Un di e rekomendashonnan di e foro hubenil (2015) tabata pa organisá e promé National Youth Leadership Training (NYLT). Despues di e presentashon di e rekomendashon aki, direktiva di Scouting Antiano a duna YNSA e tarea pa nan mes organisá e aktividat aki.
Pa e motibu aki YNSA, ta organisá e aña aki pa di 4 biaha konsekutivo un National Youth Leadership Training (NYLT) ku na aña 2017 a bai karga e nòmber DCLT. Kambio di nòmber di e kurso aki ta ku e pensamentu riba partisipashon di e islanan ku ta forma parti di Scouting Antiano i Scouting Aruba. E kurso aki ta un kurso di kuater dia den kua e hóbennan lo atkerí konosementu i abilidatnan nobo.
E kurso tin komo meta pa enrikesé e orguyo di ta Scout serka e hóbennan; I pa konsientisá e hóbennan di e ròl di hubentut den nos asosiashon i den nos komunidat.
Pa por logra e metanan ariba menshoná, e komishon organisadó di DCLT–4, ku ta konsistí di hóbennan di Scouting Antiano asistí pa lidernan lo enfoká riba e siguiente ophetivonan:
Enrikesé konosementu di e hóben tokante nos organisashon, region Interamerikano i World Organization of the Scout Movement (WOSM).
Inspirá i motivá e hóben pa nan tuma responsabilidat den nos asosashon i nos komunidat.
Desaroyá abilidat pa guia, ekspresá opinion i traha pa logra un meta komun.
Konsientisá e hóbennan di nan ròl komo Scout den nos komunidat
Pa e hóbennan sa e importansia di tin un impakto sosial den nos komunidat
Pa medio di esaki Scouting Antiano kier a yama pabien na komishon organisadó ku a sabi di organisá un tremendo i eksitoso DCLT-4.
