WILLEMSTAD – Riba promé di yüni 2021, Scouting Antiano e asosashon di Scout di Kòrsou, ta selebrá e hecho ku 91 aña pasá ofisialmente e promé grupo di Scout a keda fundá na Kòrsou.

Pioneronan manera Carl Nicolaas (Shon Cai) Winkel i Marinus van de Maarel dia promé di yüni 1930 a fundá e promé grupo di Scouting yamá Briongroep ku tabata reuní na Rif. E tempu ei e grupo tabata forma parti di “de Nederlandse Padvindersvereniging” (N.P.V.) sekshon Kòrsou, ku a kontinuá despues komo “de Antillianse Padvinders Vereninging” (A.P.V.). Na aña 1935, sinku aña despues ku a funda N.P.V., Frater Antinus, Harry da Silva i Joop van Geffen a funda “de Katholieke Verkenners in de Nederlandse Antillen” (K.V.) i a lanta grupo Sint Tharcisius komo promé grupo di K.V.

Den transkurso di añanan tantu A.P.V. komo K.V. a sigui desaroyá i diferente grupo a lanta. Despues di basta aña di kombersashon e organisashonnan A.P.V. i K.V. a uni i pa promé di yanüari 1997 Scouting Antiano a bira operashonal komo susesor di e 2 organisashonnan. Aktualmente Scouting Antiano ta konta ku mas òf ménos 1300 miembro repartí den 21 grupo aktivo den diferente bario rònt Kòrsou.,Tambe tin grupo aktivo na Boneiru i unu na St. Maarten.

Dia 23 di aprel Scoutnan rònt mundu ta selebrá dia di San Jorge ku ta e patrono di Scouting Mundial. Lord Baden Powell, fundador di Scouting Mundial, originalmente a skohé San Jorge komo patrono di Scouting Mundial pa su akto di heroismo.

Scouting Antiano tambe tur aña ta selebrá e dia di San Jorge ku un gran evenemento kaminda ta rekordá e lucha di San Jorge, un kabayero ku a liberá e pueblesito di un dragon maligno ku tur aña tabata eksigí un mucha muhé hóben komo sakrifisio. Dragonnan no ta eksistí mas. Sinembargo tur dia maldat ta lur nos hóbennan pa hinka nan den mal kaminda. Ku e balentia di San Jorge nos hóbennan Scout ta vense maldat ku positivismo i amor. Hustamente e dragon ku a asotá mundu kompletu yamá Covid-19 a pone ku pa dos aña tras di otro Scoutnan di Kòrsou no por a selebrá dia di San Jorge na e manera tradishonal. Komo bon Scout nos no a laga e dragon “Covid-19” stroba nos. Nos a sa di prevalesé i di manera virtual a selebrá dia di San Jorge na un manera spesial i asina renobá nos promesa manera un bon Scout.

Komo tradishon Scouting Antiano ta rekonosé riba dia di San Jorge un instituto òf persona ku a destaká riba tenero di trabou boluntario komo resipiente di e “Rosa di San Jorge” pa su aporte brindá na mehorashon di komunidat di Kòrsou. E aña aki nos ta rekonosé 2 resipiente. Ku gran entusiasmo nos di Scouting Antiano riba dia di San Jorge 2021 a otorgá un “Rosa di San Jorge” na e tim di Epidemiologia, Bakunashon i “Frontliners” representá pa Dr. Izzy Gerstenbluth den e lucha kontra Covid-19. E tim aki a sa di prevalesé i enfrentá e dragon di Covid-19 ku balentia riskando nan mes bida pa por a skapa esnan di otro. E otro Rosa di San Jorge 2021 nos a otorgá na “Voedselbank Curaçao” representando “Samenwerkende Hulporganisaties” i boluntarionan ku ta traha huntu den distribushon di paketenan di komestibel pa esnan ku a haña nan mes den pèrtá i sin trabou, komo konsekuensia di Covid-19.

Pa medio di esaki Scouting Antiano ta gradisí kada un profeshonal i boluntario, e asina yama “Frontliners” i e tim di boluntario di “Voedselbank Curaçao” pa e ekselente trabou ku nan a desplegá durante di e pandemia kousá pa e viro di Covid-19. Ku nos Gran Hòpman Bendishoná boso kada un i boso famia pa trabou ku no tin sufisiente manera di yama boso danki p’é.