Koempoelan Aruba 2019 – “I AM ME”

Nov 23, 2019

ORANJESTAD – ARUBA – Den e wikènt di 15 pa 17 di Novèmber 2019,E asosashon di Scout – Scouting Aruba a organisá, Koempoelan 2019.

E palabra koempoelan òf kumpulan manera nan ta bisa ta un palabra ku ta bin di e lenga Indones ku ta literalmente nifiká un reunion òf enkuentro di lidernan “desa”, e “wedono’s” (lidernan di distrikto) i gobernantenan. Mas despues e palabra aki a haña e nifikashon di un reunion familiar ameno i sosial kaminda miembronan di famia ta disfrutá di un bon “rijsttafel” i otro kumindanan indones bou di kua diferente tópikonan ta wòrdu diskutí.

E reunion di lidernan di Kòrsou, Aruba, Bonaire i Sint Maarten ku anulamentu ta wòrdu organisá den e luna di Novèmber, na un di e diferente islanan su nifikashon ta mes un kos ku esun Indones, pues un reunion di ameno di lidernan di diferente organisashon di Scouting i algun otro organisashonnan uniformá kaminda bou di un esfera sosial, ameno diferente tópikonan di interes i edukativo ta wòrdu diskutí, kombinando esaki ku dinamikanan di tim i temanan nan festivo, kultural i turístiko.

E tema di e Koempoelan 2019, tabata “I AM ME”, un tema bon skohe ku ta para ketu riba e persona i e lider kubo ta mira den spil di bida. Ki tesoro mas balioso ku “AMI”; Ami e persona, Ami e lider, Ami e boluntario, Ami e futuro di mayan, Ami e “role model”, Ami e diferensia, Ami e SCOUT.

E programa di Koempoelan 2019, ku a kuminsá djabièrnè, 15 di Novèmber ku un tremendo apertura i homenage na e dos pèrsona ku Koempoelan a wòrdu dediká na dje.

Koempoelan 2019 a wòrdu dediká na dos lider di hopi trayektoria i ku un kuríkulo den Scouting impreshonante di Scouting Aruba i APG, ku ta Señor Johan Vrieswijk di Scouting Aruba i Señora Crusita Schel “Lameta” di A.P.G. Nos mester apuntá ku Señora Crusita ku tin un edat respetá di 87 aña ainda ta aktivo ku su organisashon.

Djasabra, 16 di Novèmber, e dia a ranka Sali ku dos tremendo charla/workshop ku tabata konsentrá rondó di e tema di Derechonan di mucha na Sentro San Martin, Santa Cruz. Na final kada miembro por a dekorá un dashi blanku ku un pintura di loke ku ta tipifiká nan komo hende i Scout. Atardi tabatin weganan hopi interesante di Team Building kantu di laman na Barcadera, kaminda e partisipantenan por a kompetí kontra otro den eventonan akuatiko, manera traha vlòt i halamentu di kabuya. E djasabra anochi a kulminá ku un tremendo fiesta i sena na Indian Rock banda di Hooiberg. E tema di e anochi tabata “Bohemian Fantasy”.

Djadumingu, 17 di Novèmber, e partisipantenan a reuní na Misa di Santa Cruz, Parokia Inmaculada Concepción. E Santu Sakrifisio di misa a wòrdu presidí dor di Pastor Jairo Maduro, ku na su manera speshal e trese un tremendo predikashi na tur presente. Despues di misa e partisipantenan di Koempoelan 2019 a bai bek Sentro San Martin, kaminda ku e klousura di Koempoelan 2019 i interkambio di regalonan a tuma lugá.

Den un palabra por konkluí ku e Koempoelan 2019 organisá pa Scouting Aruba tabata un éksito rotundo den kua tur ku a partisipá a siña hopi, forma amistatnan duradero i a gosa un bòl.

Pa medio di esaki Scouting Antiano kier a gradisí Scouting Aruba i yama danki pa un tremendo Koempoelan Aruba 2019.

KOEMPOELAN 2020 LO WORDU ORGANISA NA SINT MARTEN DOR DI SCOUTING ANTIANO, KEDA PENDIENTE……

Photos by Regis F. Mercera

 

 

 

 

 

 

Contact Us

8 + 8 =

info@scoutingantiano.org

+59997374765