Scouting Antiano i Scouting Aruba preparando pa 90 aña mas di Scouting riba nos islanan.

Nov 12, 2019

Na 1930 a establesé e promé organisashon formal na, e tempu ei, Antias Hulandes. Pues otro aña, na 2020, nos lo selebrá ku ya pa 90 aña tin Scouting na Kòrsou i Aruba.

Apesar di basta kambio den konstelashon estatal komo den e organisashon di Scouting mes, ketu bai tin un bon relashon entre Scouting Antiano i Scouting Aruba.  Tur dos tin e firme intenshon pa por selebrá 90 aña di Scouting, ofresiendo nos hubentut un programa di Scouting aktualisá, atraktivo i yen di retu.

Preparando pa esaki Scouting Aruba a organisá un tayer di programa pa e sekshon di Wèlp, esta e sekshon pa nos muchanan di 7 pa 11 aña di edat. Scouting Aruba a invitá e Komisario di programa di Scouting Antiano, Akela Idylliene Corsen-Simon pa kompartí su konosementu i eksperensia den e area aki ku e lidernan di Aruba. Alto Komisario interino di Scouting Antiano, Hopman Daniel Corsen, tambe a duna un aporte na e tayer aki probechando mesora pa kombersá ku Alto komisario di Scouting Aruba, Christopher Lake, pa asina estrecha e koperashon entre e dos organisashonnan. Opviamente Scouting Aruba a hasi bon uzo di e echo ku Iliëne Corsen, un di e konseheronan internashonal di e Organisashon Mundial di Scouting, aktualmente ta biba na Aruba, pa e tambe duna un aporte na e tayer aki.

29 lider, hopi entusiasmá, di Scouting Aruba a partisipá na e tayer aki ku den tur sentido a resultá un eksito.

Scouting Antiano i Scouting Aruba trahando un fundeshi pa sigur 90 aña mas di Scouting riba nos islanan.

 

 

Contact Us


info@scoutingantiano.org

+59997374765