Riba e mainta di 8 di Sèptèmber 1919, e fundadó di Scouting Mundial, Lord Stephenson Smyth Baden-Powell di Gilwell a kuminsá ku un kampamentu pa lider riba e tereno di Gilwell djis pafó di Londres na Inglatera. Despues di a kompletá e 11 dianan di kurso, Baden-Powell a duna kada partisipante dos kralchi di palu, komo muestra ku nan a kaba e kurso, i asina Wood Badge a nase.

E treinen di Wood Badge a wòrdu organisá pa duna e adultonan ku ta partisipá na esaki, e eksperensha di kiko ta miembro di un Trup di Scout. Den e treinen aki nan ta tuma ròl di Scouts, den kua nan ta forma Patruyanan den kua e ròl di Lider di Patruya i su asistente.

E selebrashon di 100 aña Wood Badge a ranka Sali ku un Santu Sakrifisio di Misa ku a tuma lugá na misa di Suffisant riba 9 di Sèptèmber, 2019 ku a wòrdu presidí pa Pastor Morrison Laporte Kapelan di Scouting Antiano.

E di dos parti di e selebrashon di 100 aña Wood Badge a tuma logra 26 di Òktober, 2019 ku partisipashon di mayoria Wood Badgers di Scouting Antiano na e sentro di Kampamentu di Brakapoti.

Den e selebrashon tur afó e Wood Badgers por a rebibá momentonan hopi emoshonante di loke nan e eksperensha den e kurso di Wood Badge. Direktor di rekurso humano di Scouting Antiano GL Ezzard “Dja” Ignacio a hasi apertura di e reunion dor di klaba e hacha di Wood Badge den e tronkon di palu i a duna un rekuento di kon Wood Badge Mundial a kuminsá i kon den e era nobo di Scouting Antiano e kurso di Wood Badge a wòrdu rebibá. I ku awor tin mas ku setenta Wood Badgers na Kòrsou.

Hopman Stanley Cijntje a dirigí e sekshon di kantamentu ku a kai masha na smak di un i tur.

Presidente di Scouting Antiano a hiba palabra na nòmber di direktiva i a rekordá tur Wood Badger presente ku ta un Wood Badger No ta un signo di distinshon mas pero e ta un signo ku abo komo lider a superá bo mes i mester pasa bo konosementu over pa e miembronan di Scouting Antiano.

Señora Lizette Sambo-Velder Direktora di Ministerio di Enseñansa, Sensia, Kultura i Deporte di Curaçao tabata e orador di órden di e anochi aki. Señora Sambo-Velder den su spich a splika e Wood badgers nan e diferensha entre Edukashon Formal i Informal. Por sierto un diskurso interaktivo ku un kontenido hopi emoshonal pa kada lider presente. Señora Sambo-Velder a yama kada lider danki pa nan aporte i tempu lider ku nan ta dediká na Scouting i e hóbennan di Kòrsou en partikular.

Despues di e parti ofisial a sigui ku partimentu di salu ku bolo pa tur ku tabata presente.

Pa medio di esaki Scouting Antiano kier a yama danki na e komishon ku a sòru pa un tremendo Gilwell reunion.