Tradishonalmente den luna di òktober ta tuma lugá mundialmente un kampamentu di komunikashon yamá Jota Joti. Jota-Joti ta para pa Jamboree on the Air i Jamboree on the Internèt.

E aña aki e kampamentu aki ta e fecha 18 pa 20 di òktober 2019. Pa nos na Kòrsou Jota Joti tin un balor agregá. E ta un di e poko kampamentu nan den kual mayoria gruponan uniformá di Kòrsou ta topa otro i interkambiá.

Debí ku e kampamentu aki ta trata di komunikashon, Scouting Antiano tur aña ta invitá otro organisashonnan uniformá pa forma parti di e tremendo kampamentu aki.

Mas ku 300 scout, explorer I lider ku ta konsistí di Scouting Antiano, AJMG, AGPNA i JLB ta partisipá na e kampamentu aki.

E komishon ta konsistí di hóbennan di organisashonnan uniformá ku ta partisipá na e kampamentu, kual ta Scouting Antiano, AGPNA, AJMG i JLB.

Tema di e kampamentu pa e aña aki ta: “Ban komuniká nos kultura”

Nos lo focus riba e komunikashon verbal i no verbal a base e tema ya menshoná. Awendia teknologia i digitalisashon ta forma un parti importante di nos bida diario. Esaki no ta aki na Kòrsou so, pero mundialmente e ta un echo. Pa ku esei nos lo hiba nos hóbennan bek den tempu di nos antepasadonan den kua e pòstnan lo ta diferente forma di komuniká ku e hendenan di ántes tabata uza.

Meta

• Komuniká i sera amistat ku otro i ku mas ku 220 pais i teritorionan rònt mundu, via sistemanan di komunikashon e.o., Radio Amatùr i Internèt. (Telefòn usando Apps, Facebook, Chat etc.)

• Logra union i traha huntu den gruponan uniformá aki na Kòrsou

• Siña di nos kultura, nos historia, instrumèntnan, kantonan i baile (manera di komuniká di antes).

• Rebibá bek kampvuur

• Hóbennan ta haña mas konosementu di formanan di komuniká/ekspreshon ku tabata wòrdu uza ántes, asina por balorá mas loke nan tin aktualmente

Komishon organisadó kier a pone énfasis riba e siñansa di historia di nos kultura den forma di komuniká i ekspresá. E parti aki di e aktividat lo bai bira hopi interesante den kual nos lo bai pone tambe un ambiente semi kultural.