WILLEMSTAD – Dia 22 di Yüli 2019, tabata e inougurashon di e di 24 World Scout Jamboree Mundial, kaminda mas di 45,000 Scout I Lider Scout di mas ku 150 pais a bini huntu na Summit Bechtel Reserve, West Virginia – Estados Unidos (USA), pa “Unlock a New World,” ku ta e tema di e Jamboree. Kada kuater aña e Movementu di Scout Mundial – WOSM ta organisá e kampamentu internashonal aki ku partisipashon di Scoutnan di kada skina di e mundu aki. Un staf di 10,500 lider boluntario lo yuda organisá un eksperensha inolvidabel pa e hóbennan ku a partisipá na e Jamboree. E sentro di kampamentu Summit Bechtel Reserve na West Virginia tin un superfisie di 40 kilometer kuadra ku ta mas o ménos 10% di superfisie di Kòrsou. E organisashonnan Scout di Merka, Canada i Mexico tin dies aña bezig organisando e Jamboree Mundial aki, ku por sierto ta e kampamentu mas sustenibel ku Scouting Mundial a yega di konosé.