WILLEMSTAD – Scouting Antiano ta e asosashon di Scout di Curaçao ful miembro di WOSM ku un miembresia di 1,500 Scout riba e aña aki atrobe ta bai partisipá na un Jamboree Mundial. E Jamboree Mundial di aña 2019 lo wòrdu tene na West Virginia – Estádos Unídos (USA). Kada kuater aña e Movementu di Scout Mundial – WOSM ta organisá e kampamentu internashonal aki ku partisipashon di Scout di kada skina di e mundu aki.

Baden-Powell e fundadó di e Movementu di Scout Mundial a skohe e nòmber di “Jamboree” pa e evento mundial aki. E nòmber aki ta basa riba kon e pueblo Afrikano Swahili ta kuminda otro “JAMBO” ku ta nifiká “HALLO”. Awe un dia e palabra Jamboree ta un terminologia Internashonal ku ta deskribí un kampamentu grandi di Scoutnan. For di 1920, Jamboreenan a wòrdu tene kasi kada Kuater aña, ku eksepshon durante segunda guera mundial, na diferente pais di nos mundu. E di 24 edishon di Jamboree Mundial lo wòrdu organisá pa Merka, Canada i Mexico, di 22 di Yüli pa 2 di Ougùstùs 2019 na Summit Bechtel Reserve na West Virginia, Estádos Unídos di Merka. E tema di e di 24 World Scout Jamboree lo ta “Unlock a New World”

Scouting Antiano lo [partisipá na e Jamboree Mundial ku un delegashon di 17 Scouts – 2 CMT (Contingent Management Team) – 2 Lider i 3 IST (International Service Team) ku ta lidernan ku lo bai yuda den e organisashon. E lider di Kontingente lo ta Hopman Elvis Reed.

Nos kontingente lo sali dia 17 di Yüli i lo regresá 3 di Ougùstùs bek Kòrsou.

Pa medio di esaki Scouting Antiano kier a yama nos kontigente tur klase di éksito i ku nan representá nos organisashon i nos dushi Kòrsou dignamente.