Treinin di Dialogo di Pas

Nov 22, 2018

WILLEMSTAD – Den wikènt di 4 pa 6 Mei, lidernan di diferente sekshon di Scouting Antiano huntu ku lidernan di Scouting Aruba a partisipá na un wikènt di introdukshon di e tema di “Diálogo pa Pas”.

E mundu ku nos ta bida aden ta hopi diversifiká. De fakto diversividat ta tur kaminda, den naturalesa, den e mundu animal i den humanidat. Si nos wak den humanidat en general, nos lo ripara kuantu diversidat ta eksistí: den kultura, lenganan, religionnan etc. Hopi biaha e diferenshanan aki ta wòrdu konsiderá komo rikesanan. E diversividat di kumindanan i e mundu kulinario rònt mundu ta un bon ehèmpel di esaki. Pero hopi biaha, algun diferensha ta wòrdu persibí komo problemátiko i ta bira rason pa krea konflikto.

Awendia rònt mundu, tin diferente tipo di violensha ku ta mará na konfliktonan soshal. I den hopi kaso, hende ta hustifiká e violenshanan aki mustrando dede riba entre otro diferenshanan kultural, religioso i ètniko ku nunka a haña solushon ni rekonsiliashon. Kousa di e konfliktonan aki ta sea rekursonan, diferensha den persepshon òf persepshon robes.

Hopi biaha e kousa di e konflikto ta ku esaki ta mará na persepshonnan robes òf sentimentunan negativo di un grupo pa ku e otro. Persepshon robes fásilmente ta konbertí den stereotiponan pa por hustifiká pakiko nos ta deskriminá un òf mas persona.

Deskriminashon inmediatamente ta krea tenshon pasombra esaki ta basá riba komportashon robes di un persona pa ku e otro òf di un grupo pa e otro.  Si no yega na un solushon lihé, e tenshonnan aki por sigui krese i bira konfliktonan soshal i/òf violento.

Tin hopi hende ku ta forma parti di nos komunidat ku ta wòrdu deskriminá a base di nan kultura, religion, mal komprendementu i mal persepshon. Ora ku konfliktonan soshal krese i sali for di man tin biaha miónes di persona por wòrdu afektá. Hopi biaha nan ta kuminsá odia otro te na un punto ku nan lo no por biba huntu mas. Nan ta habri mas i mas for di otro i komunikashon ta bira mas i mas difísil.

Preguntanan ku ta surgi ta. Kon por evitá problemanan di komunikashon? Kon nos por evitá tenshon i konflikto? Kon nos por transformá konflikto den oportunidatnan i kooperashon ku otro? Esaki por sosodé dor di Diálogo komo método pa yega na pas. Dialogando nos por siña na topa similaridatnan ku nos no a ripara promé, asta nos por yega asina leu di por respetá i tin biaha apresiá diferenshanan di otro. Diálogo ta un método pa yega na transformashon di e individuonan den konflikto, i por lo tanto, kambia e persepshonnan robes ku nos tin di otro, i asina kambia e sentimentunan negativo ku nos tin pa otro.

Contact Us

3 + 15 =

info@scoutingantiano.org

+59997374765