WILLEMSTAD –  Dia 23 di Aprel tur Scout rònt mundu ta selebrá e dia di San Jorge, ku ta e patrono di Scouting Mundial. Lord Baden-Powell fundador di Scouting Mundial originalmente a skohe San Jorge komo patrono di Scouting Mundial pa su akto di heroismo.

Scouting Antiano e Asosashon Scout di Curaçao tambe tur aña ta selebrá e dia di San Jorge ku un gran evenemento kaminda ta rekordá e lucha di San Jorge un kabayero ku a liberá e pueblesito di un dragon maligno ku tabata eksigí un mucha muhé hóben komo sakrifisio tur aña.

Dragonnan no ta eksistí mas pero si ta eksistí maldat ku tur dia ta lur riba nos hóbennan pa hinka nan den mal kaminda, pero ku e balentia di nos di San Jorge nos hóbennan Scout lo vense maldat, ku positivismo, i amor. 

E aña aki dor ku 23 di aprel, dia di San Jorge ta kai riba un djamars, Scouting Antiano lo selebrá dia di San Jorge riba djasabra 20 di aprel, 2019. 

Komo parti di e selebrashon di dia di San Jorge tur Scout grandi i chikí lo renobá nan promesa di Scout, tambe nos lo rekonosé un instituto òf persona boluntario ku e Rosa di San Jorge pa nan aporte boluntario pa mehorashon di komunidat di Kòrsou. 

Ku gran entusiasmo nos di Scouting Antiano riba e dia di selebrashon di San Jorge, a inisiá ku e promé pasonan pa lanta un Grupo nobo di “Zeeverkenners” di e bario di Boka di Samí. 

Riba e dia memorabel aki Gobernador di Kòrsou Su Ekselensha Sra. Lucille George-Wout, tambe tabata presente na e selebrashon di dia di San Jorge, huntu tambe ku Ministernan Sra. Acala-Walle, Sra. Jezus-Leito i Parlamentario Sra. Constancia.

Komo parti di e selebrashon di dia di San Jorge, Scouting Antiano a otorgá e Rosa di San Jorge 2019, na Instituto Buena Bista i Tirzo Martha su aporte balioso na e mundu di Arte kontemporáneo i e desaroyo di hóbennan lokal komo artistanan di futuro.

Despues di e parti ofisial, Gruponan di Scouting Antiano a desfilá den kayanan di e bario di Boka di Sami, kompaña pa drùm bandnan.